Ix-Xagħra hija mibnija fuq għolja lejn iċ-ċentru tal-grigal tal-gżira Għawdxija. Tinsab ftit inqas minn erba’ kilometri ‘l bogħod mir-Rabat; il-belt kapitali tal-gżira, u hija deskritta b’mod xieraq bħala r-raħal tal-Madonna. Ix-Xagħra kienet waħda mill-ewwel żoni abitati ta’ Għawdex. F’dokumenti moderni bikrin, din l-art bdiet tissejjaħ Xagħret il-Għażżenin. Fi żminijiet moderni, in-nies abitaw għall-ewwel darba fuq l-ogħla punt tal-għolja, hekk imsejjaħ tal-Qaċċa. Dan ġie Taljanizzat għal Caccia, l-isem li bih ix-Xagħra tissemma fil-maġġoranza tad-dokumenti miktuba sa qabel it-Tieni Gwerra Dinjija. L-ewwel parti tar-raħal illum il-ġurnata tissejjaħ ta’ Sant’Anton; dan minħabba d-dedikazzjoni lejn kappella taż-żmien tard Medjevali, ddedikata lil Sant’Anton Abbati. Fil-lingwa mitkellma, il-post kien komunement imsejjaħ ix-Xagħra, litteralment, medda ta’ blat miksi b’roqgħa ta’ ħamrija ħamra. L-isem ġej mit-tieni parti jew aħjar miż-żona ċentrali tal-għolja magħrufa bħala Xagħret il-Għażżenin, inkella l-art tar-rgħajja. Eventwalment rebaħ l-isem Ix-Xagħra.
